Kreu i Unioni Turistik Shqiptar, Rahman Kasa, ka reaguar lidhur me debatet dhe protestat kundër projektit turistik në Zvërnec, duke theksuar se investimet strategjike janë thelbësore për zhvillimin ekonomik dhe rritjen e konkurrueshmërisë së Shqipërisë në tregun ndërkombëtar të turizmit.
Sipas Kasës, kundërshtimet ndaj projektit, i cili sipas tij përfaqëson një investim prej më shumë se 4 miliardë eurosh, nuk i shërbejnë interesit afatgjatë të vendit. Ai argumentoi se situata të tilla mund të ndikojnë negativisht në klimën e investimeve dhe të dekurajojnë investitorët e huaj.
Kreu i Unionit Turistik Shqiptar vlerësoi se projekte të këtij niveli, të lidhura me marka prestigjioze ndërkombëtare si Mandarin Oriental, Aman dhe Atlantis, do të rrisin profilin e Shqipërisë si destinacion turistik dhe do të krijojnë mundësi të reja ekonomike për bizneset vendase.
“Investime të tilla rrisin vlerën e pronës, krijojnë mundësi për sipërmarrjet lokale dhe forcojnë pozicionin e Shqipërisë në hartën ndërkombëtare të turizmit”, u shpreh ai.
Kasa theksoi se e drejta për të protestuar duhet respektuar, por shtoi se projektet strategjike nuk duhet të refuzohen pa një analizë të plotë të përfitimeve dhe ndikimeve të tyre.
Ai nënvizoi gjithashtu se investimi në Zvërnec mund të gjenerojë mbi 10 mijë vende pune dhe të shndërrojë zonën në një prej qendrave kryesore të zhvillimit ekonomik në vend.
Lidhur me pretendimet për mbivendosje pronash, Kasa deklaroi se çdo mosmarrëveshje duhet të zgjidhet përmes institucioneve ligjore dhe proceseve gjyqësore, duke garantuar respektimin e të drejtave të pronarëve dhe sigurinë juridike të investimit.
Ai komentoi edhe reagimet që kanë ardhur nga qarqe politike greke, duke i cilësuar ato si të papërshtatshme dhe jo në funksion të marrëdhënieve të mira mes dy vendeve.
Sa i përket shqetësimeve mjedisore, Kasa tha se zhvillimi i turizmit modern nuk mund të konceptohet pa mbrojtjen e natyrës, biodiversitetit dhe trashëgimisë kulturore, por shtoi se kjo nuk duhet të përdoret si argument për të bllokuar automatikisht projektet e rëndësishme zhvillimore.
Në përfundim, ai e cilësoi Zvërnecin si një nga asetet më të çmuara turistike të Shqipërisë dhe kërkoi që zhvillimi i zonës të udhëhiqet nga profesionalizmi, transparenca dhe një vizion afatgjatë për ekonominë dhe turizmin shqiptar.