Një 26-vjeçar është arrestuar nga Policia e Shkodrës pasi akuzohet se ka kanosur me armë zjarri një të ri 20-vjeçar, pas një konflikti për motive të dobëta në lagjen “Tre Heronjtë”. Ngjarja u raportua rreth orës 13:00, pranë Stacionit të Trenit, ku u dëgjuan të shtëna në ajër.
Pas ndërhyrjes së shpejtë, forcat e rendit, të mbështetura nga njësia “Shqiponja”, bënë të mundur identifikimin dhe kapjen e autorit të dyshuar, Altin Shpendi, 26 vjeç. Sipas hetimeve paraprake, ai dyshohet se ka qëlluar me armë automatike në ajër për të kërcënuar të riun Xh. G., 20 vjeç, dhe është larguar menjëherë pas ngjarjes.
Policia ka sekuestruar edhe armën e zjarrit të përdorur, ndërsa vijojnë hetimet për zbardhjen e plotë të rrethanave. Materialet i janë kaluar Prokurorisë së Shkodrës për procedim të mëtejshëm.