Agjencia e Mbikëqyrjes Policore (AMP), në bashkëpunim me Drejtorinë e Hetimit Doganor dhe Prokurorinë e Shkodrës, ka ekzekutuar urdhra ndalimi ndaj katër zyrtarëve të pikës së kalimit kufitar Hani i Hotit, të cilët akuzohen për shpërdorim detyre në lidhje me një ngjarje të ndodhur në shtator të vitit 2023.
Të arrestuarit janë tre punonjës policie: Leke Çekrezi, Fatjon Hamzi dhe Tonin Melaj si dhe doganieri Selami Ethemi. Ata dyshohen se kanë lejuar kalimin e një kamioni me targa shqiptare, i cili transportonte 442.084 kg lëndë narkotike të dyshuar si kanabis sativa, drejt territorit malazez.
Ngjarja ndodhi më 17 shtator 2023, kur kamioni pasi kaloi kontrollet në Shqipëri, u ndalua nga autoritetet malazeze në Pikën Kufitare “Bozaj”, ku u zbulua ngarkesa e drogës.
Operacioni u finalizua pas hetimeve disa mujore dhe përdorimit të metodave speciale të ndjekjes, duke çuar në ndalimin e zyrtarëve të përfshirë, të cilët akuzohen për cenim të rëndë të sigurisë kufitare dhe bashkëpunim në një aktivitet të paligjshëm.