Gjatë arrestimit pas vrasjes së shqiptarit në Greqi, 46-vjeçari Mikel Selimaj, i njohur për përfshirjen në trafik droge dhe gjobvënie, kërcënoi një oficer policie gjatë arrestimit. I ndikuar nga kokaina, ai i tha policit: “Je me fat që nuk e kam armën me vete sepse e hodha, ndryshe ta tregoja unë.”
Ngjarja e rëndë nisi të martën në mbrëmje, kur viktima 41-vjeçar Altin Arapaj u rrëmbye nga Selimaj dhe dy persona të tjerë. Gjatë rrugës, viktima u qëllua dhe dërgoi mesazh gruas së tij: “Sapo më qëlluan. Ejani të më gjeni me GPS-in në telefonin tim.”
Gruaja denoncoi ngjarjen mëngjesin tjetër, por pas kërkimeve, trupin e Arapajt e gjetën të vdekur në një vresht, me gjurmë gjaku në telefonin e tij dhe shenja që ai mund të ketë qenë gjallë disa orë pas plagosjes.
Dyshohet se konflikti mes viktimës dhe autorit kishte lidhje me menaxhimin e një prone luksoze në Artemida, një shtëpi që vlerësohet rreth 2 milionë euro dhe që kishte shërbyer si Airbnb. Gruaja e viktimës deklaroi:
“Mosmarrëveshjet nuk ishin për hesapet personale, por për këtë pronë buzë detit, të cilën na e morën.”
Policia arrestoi edhe dy bashkëpunëtorët e Selimajt, ndaj të cilëve është ngritur padi për bashkëpunim në vrasje. Brenda automjetit të tyre u gjetën gjurmë gjaku dhe një gëzhojë arme.
Zyrtarët policorë besojnë se pas mosmarrëveshjeve që çuan në vrasje qëndron edhe trafiku i drogës, aktivitet ku Selimaj ishte i përfshirë prej kohësh.