Një nuse në Florida, e cila po përpiqej të mbërrinte në kohë në ceremoninë e saj martesore, përfundoi duke u ndaluar nga policia për shkak të shpejtësisë së tepruar. Sipas autoriteteve, automjeti në të cilin ndodhej nusja u kap duke lëvizur me 170 kilometra në orë.
Ngjarja ndodhi të premten, rreth orës 14:42, në Port St. Lucie. Automjeti po drejtohej nga një prej të ftuarve të dasmës, ndërsa destinacioni ishte qyteti Stuart, ku ceremonia do të fillonte në orën 14:30. Kur u ndaluan, ata ndodheshin ende rreth 10 milje larg vendit të dasmës.
Pamjet e publikuara nga policia tregojnë momentin kur oficeri afrohet te makina dhe pyet: “Dasma e kujt është kjo?”, për të marrë përgjigjen nga ulësja e pasagjerit: “E imja”. Oficeri reagon me një koment ironik: “Tashmë je vonë”, ndërsa nusja e shqetësuar përgjigjet: “Po përpiqemi të arrijmë atje”.
Pavarësisht shkeljes së rëndë, polici nuk i ndaloi më tej, por i lëshoi shoferit një urdhër për paraqitje të detyrueshme në gjykatë.
“Thonë që shiu në ditën e dasmës sjell fat”, shkroi policia në një njoftim në rrjete sociale. “Por në këtë ditë me diell, shoferi i nuses përfundoi me një datë gjyqi, pasi po përpiqej me çdo kusht ta çonte nusen në kohë në altar – edhe pse tashmë ishte me vonesë.”