Artikull i Corriere della Sera
SHENGJIN (SHQIPËRI) – Nuk mund të shohësh askënd , as një shpirt të gjallë, në 70 mijë metra katrorë rrugë dhe ndërtesa parafabrikate të ndërtuara në mes të askundit në Gjadër, një orë larg me makinë nga Tirana.
Vetëm një grup i vogël policësh ruanin hyrjen e kësaj “cope të Italisë” në tokën shqiptare.
Duke e parë nga lart, me gardhet e saj 9 metra të larta, të sjell ndërmend kështjellën e Bastianit, majën e një kodre të largët në një vend shkretëtirë dhe pritjen e emigrantëve në vend të tatarëve.
Ngarkesa e re e “mysafirëve” pritet pas pak ditësh : me rikthimin e motit të mirë, emigrantët e paligjshëm janë shtuar (235 mes Lampedusa dhe Pozzallo gjatë fundjavës) dhe “Operacioni Albania” rifillon sot me pozicionimin e anijes Libra të Marinës në ujërat ndërkombëtare, në brigjet e Lampedusa-s, gati për të mbledhur emigrantët e kapur nga rojet bregdetare dhe për të transferuar të “përshtatshëm” në qendrat e ndërtuara në anën tjetër të Adriatikut: meshkuj të rritur, të vetëm, jo të dënuar dhe që vijnë nga vende të sigurta.
Disa orë për transport, pastaj skanimi i parë në det dhe në fund dy ditë udhëtim për në Shëngjin , mes të mërkurës dhe të enjtes, nëse deti nuk zemërohet.
Ndaj qeveria italiane tenton sërish, e forcuar nga dekreti i ri ligjor për vendet e sigurta, me të cilin shpreson këtë herë të mund të parandalojë “lirimin” dhe sjelljen e refugjatëve në Itali, pas vendimit të gjykatësve në Romë, siç ndodhi në tetor.