Presidenti i Fenerbahçes, Ali Koç, ka treguar për herë të parë arsyet që çuan në shkarkimin e Jose Mourinhos, vetëm një vit pas ardhjes së tij në Stamboll.
Sipas tij, humbja vendimtare ndaj Benficas, që eliminoi klubin turk nga faza e grupeve të Ligës së Kampionëve, ishte momenti që e vulosi ndarjen.
“Futbolli sulmues mungoi sezonin e kaluar. Folëm për këtë dhe menduam se ramë dakord. Por edhe këtë sezon, në pesë ndeshjet e para zyrtare, pamë të njëjtën lojë. Benfica mund të eliminojë këdo, por mënyra se si luajtëm më shqetësoi. Kjo ishte pika e fundit,” tha Koç për gazetën portugeze Record.
Ai theksoi se pavarësisht vendimit të vështirë, marrëdhënia me trajnerin portugez mbetet korrekte:
“Mourinho ishte punëtor, nuk kam asnjë ankesë personale kundër tij. Ishte një ndarje e hidhur, por miqësore.”
Kontrata e Mourinhos, e cila kishte edhe një vit afat, u ndërpre para kohe. Sipas gazetarit turk Yagiz Sabuncuoglu, portugezi do të përfitojë një kompensim prej rreth 9 milionë eurosh.
Kjo shifër e çon në rreth 110 milionë euro totalin e fituar prej tij vetëm nga shkarkimet gjatë karrierës – shumë më tepër se rivalët e tij. Për krahasim, Antonio Conte ka arkëtuar rreth 43 milionë euro nga largimet, mes tyre 30.4 milionë euro vetëm nga Chelsea në vitin 2018.