Zbardhen detaje të reja nga hetimet për shpërthimin me tritol në një biznes në Kamëz. Një nga të arrestuarit është ish-oficeri i operacionales, Jeton Jami, i cili më herët ishte proceduar për shpërdorim detyre, pasi dyshohej se kishte shoqëruar Ervis Martinajn para zhdukjes së tij misterioze.
Sipas burimeve hetimore, grupi i goditur dyshohet të jetë i përfshirë në veprimtari gjobëvënieje, ndërsa dinamika e ngjarjes ka hapur pistën e një përplasjeje të brendshme mes anëtarëve të tij.
Burime bëjnë me dije se dy kunetërit, biznesi i të cilëve u godit me tritol, dyshohen gjithashtu si pjesë e këtij grupi kriminal. Hetuesit po verifikojnë dyshimet se ngjarja mund të ketë qenë një hakmarrje ose paralajmërim i brendshëm, pasi ndërmjet tyre ka pasur konflikte të mundshme për ndarje parash.
Në këtë kontekst, lënda shpërthyese e vendosur një ditë më parë dyshohet se është përdorur për t’u kërkuar 500 mijë euro gjobëvënie, shifër që lidhet drejtpërdrejt me aktivitetin e dyshuar të grupit.
Policia dhe Prokuroria po punojnë për zbardhjen e plotë të skemës së gjobëvënies, rolin e secilit anëtar dhe lidhjet e mundshme të grupit me ngjarje të tjera kriminale në Tiranë dhe periferi.
Priten arrestime të tjera në orët në vijim.