Ish-ministri dhe përfaqësuesi i Partisë Socialiste, Petro Koçi, ka komentuar ashpër praninë e këshilltarit amerikan Chris LaCivita në Partinë Demokratike, duke e cilësuar atë si një figurë të dirigjuar plotësisht nga Sali Berisha.
Në një deklaratë për mediat, Koçi u shpreh se LaCivita nuk sjell asnjë ide të re dhe se prezenca e tij nuk do të ndikojë në ndryshimin e realitetit politik të PD-së.
“Kam dëgjuar një demokrat në takime që tha: Edhe të vijë vetë Trump, nuk fiton dot. Realiteti në PD nuk ndryshon nga një këshilltar që vjen për 4-5 javë. Një strategji nuk ndërtohet kaq vonë”, u shpreh Koçi.
Ai shtoi se LaCivita ka tejkaluar rolin e këshilltarit dhe po del publikisht, duke lexuar, sipas tij, ato që i dikton Sali Berisha.
“LaCivita është një kukull e parave të Berishës. Sa janë këto para, nuk e di. Por ai nuk thotë ndonjë tezë që të çudit, janë po ato teza të konsumuarat e Berishës për 12 vjet. Thjesht përpiqet të balancojë imazhin e rrënuar të tij.”
Sipas Koçit, LaCivita është paraqitur si një figurë neutrale që ka ardhur privatisht, por PD e përdor atë për të dhënë idenë e një mbështetjeje nga administrata amerikane.