Sekretari i Përgjithshëm i PS-së, Blendi Klosi, ka reaguar ndaj akuzave të protestuesve që kundërshtojnë projektin e parashikuar në Zvërnec, duke deklaruar se tradhti nuk do të ishte realizimi i investimit, por tërheqja prej tij.
I ftuar në emisionin “Opinion”, Klosi theksoi se ende nuk ekziston një projekt konkret, ndërsa argumentoi se braktisja e një investimi që mund të sjellë miliarda dollarë në ekonomi do të përbënte gabimin më të madh.
“Meqenëse thonë tradhtarë, tradhtarë kush e ka bërë projektin. Unë them se mbase tradhti do të jetë nëse ne tërhiqemi nga projekti”, u shpreh ai.
Gjatë debatit, Klosi bëri një paralelizëm me protestat e Partisë Socialiste kur ndodhej në opozitë, duke kujtuar grevën e urisë dhe kërkesat për transparencë ndaj qeverisë së asaj kohe.
Nga ana tjetër, moderatori Blendi Fevziu vuri në dukje se kundërshtimet nuk lidhen domosdoshmërisht me investimin në vetvete, por me mënyrën e realizimit të tij dhe mungesën e transparencës.
Klosi pranoi se çështja e rrethimit të zonës ka krijuar shqetësime, duke shtuar se masat e marra janë rishikuar pas reagimeve të qytetarëve. Ai nënvizoi se ideja e projektit diskutohet prej vitesh, por se ende nuk ka një plan të finalizuar për t’u prezantuar.