Inspektorati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) ka gjobitur me 3 mijë euro ish-ministren e Bujqësisë, Frida Krifca. Vendimi, i datës 12 qershor 2025, është bërë publik përmes faqes zyrtare të Gjykatës Administrative të Tiranës, ku kërkohet ekzekutimi i gjobës.
Në njoftim nuk specifikohet se për cilin rast konkret të konfliktit të interesit është marrë masa ndaj Krifcës, e cila aktualisht ushtron detyrën e këshilltares në Kryeministri.
Opozita ka akuzuar më herët ish-ministren se ka përfituar në mënyrë të tërthortë fonde publike, përmes kompanisë Lucom Projects, në pronësi të bashkëshortit të saj, Erti Lutaj, e cila ka marrë mbi 120 mijë euro nga Bashkia e Tiranës, sipas denoncimeve të Partisë Demokratike. Nuk dihet nëse ky është shkaku i gjobës apo një tjetër rast i lidhur me vendimmarrjen e saj gjatë kohës në postin e ministres.
Frida Krifca u shkarkua nga detyra e ministres së Bujqësisë pas skandalit me fondet e BE-së për bujqësinë, ku Komisioni Europian vendosi të ndalojë grantet për Shqipërinë për shkak të dyshimeve për korrupsion në shpërndarjen e tyre gjatë drejtimit të saj në AZHBR.
