Një zjarr i qëllimshëm në fshatin Bersnik i Poshtëm, njësia administrative Kodovjat, ka çuar në djegien e një sipërfaqeje pyjore dhe ka rrezikuar banesat përreth. Si rezultat i veprimeve hetimore për zbardhjen e autorësisë, specialistët e Hetimit të Krimeve të Komisariatit të Policisë Gramsh arrestuan në flagrancë shtetasin F. S., 26 vjeç.
Gjithashtu, materialet u referuan në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, ku nisi procedimi penal për shtetasin R. S., 70 vjeç, babai i të arrestuarit. Ata akuzohen për veprën penale “Shkatërrimi me zjarr i pyjeve dhe i mjedisit pyjor”.
Drejtoria Vendore e Policisë Elbasan apelon te qytetarët që të mos ndezin zjarre dhe u kujton se çdo veprim i tillë do të përballet me ligjin.