Një ngjarje që kufizohet me mrekullinë ka ndodhur gjatë Maratonës së Pragës më 4 maj, ku maratonisti irlandez Paul McCann, 55 vjeç, u ringjall pas 47 minutash pa rrahje zemre.
McCann, një vrapues me përvojë që kishte përfunduar mbi 20 maratona, pësoi një atak kardiak vetëm një kilometër pas nisjes së garës. Për fat të mirë, ai u rrëzua pranë një stacioni mjekësor, ku mjekët ndërhynë menjëherë me reanimacion kardiak dhe përdorën shtatë goditje me defibrilator.
Megjithatë, zemra e tij nuk rifilloi as gjatë transportit dhe as pas mbërritjes në Spitalin Universitar të Pragës. Në një përpjekje të fundit, mjekët përdorën një teknikë të avancuar të quajtur ECMO (oksigjenim membranor ekstrakorporal) – një procedurë që zëvendëson funksionin e zemrës dhe mushkërive.
Falë kësaj teknologjie, pas plot 47 minutash, zemra e McCann filloi të rrahë përsëri. Ai iu nënshtrua menjëherë një angioplastike emergjente dhe vendosjes së stenteve, duke i shpëtuar jetën në mënyrë të jashtëzakonshme.
Dy ditë më pas, ai rifitoi vetëdijen pa asnjë dëmtim neurologjik dhe tashmë është kthyer në Irlandë, në gjendje të mirë shëndetësore, duke planifikuar sfidat e tij të ardhshme.