Ermir Ndrejaj është një nga katër personat e arrestuar dje në kuadër të një operacioni të zhvilluar nga policia me urdhër të SPAK. I njohur në botën kriminale me nofkën “Cinco”, Ndrejaj luan një rol kyç në trafikun e drogës, veçanërisht në qytetin e Antwerp-it.
44-vjeçari, nga qyteti i Bajram Currit, është pronar i klubit të njohur të natës në Durrës, “Cinco Cavalli”. Ai është figura kryesore në hetime të mëdha për kontrabandën e kokainës, përfshirë hetimin e klanit Y. dhe personazheve si Frank De Tank. Ndrejaj dhe bashkëshortja e tij menaxhojnë restorantin “Savoy Garden” në Tiranë, ku gjatë verës së vitit 2024 ndodhi një ngjarje e rëndë, ku disa persona u plagosën gjatë një feste VIP.
Ky restorant ndodhet në kompleksin “Delijorgji”, aty ku një natë më parë zbarkuan agjentët e Byrosë Kombëtare të Hetimit.
Në të njëjtën zonë, ndodhet edhe biznesi tjetër Clinique Cinq që bashkë me reatorantin menaxhohet dhe administrohet nga partnerja e Ndreajt.
Gjatë operacionit të djeshëm, policia zhvilloi kontroll në banesën e tij, ku u sekuestruan prova të rëndësishme lidhur me veprimtarinë kriminale. Arrestimi i tij dhe i vëllezërve Artur dhe Ervin Hoxhosmani u realizua pas analizimit të përgjimeve të komunikimit në SKYECC, duke shënuar një goditje të rëndësishme ndaj trafikut të drogës në rajon.