TIRANË– Florian Plaku është shpallur në kërkim si njëri prej autorëve të vrasjes së ish-punonjësit të Policisë së Shtetit, Gentian Bejtjas, më 15 Mars të këtij viti në oborrin e vilës së tij.
41-vjeçari, Florian Plaku, (Serjani dhe Mamo), nga Vlora, rezulton me tre emra. Ai ka precedentë penalë dhe është pjesë e grupeve të Vlorës.
Ndaj tij gjykata e Tiranës ka caktuar më 26 korrik masën e sigurisë ‘arrest me burg’ si i dyshuar për kryerjen e veprave penale “Vrasja me paramendim” kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe i municionit’. Shërbimet e DVP Tiranë, të mbështetura në fazën operacionale nga shërbimet e DVP Vlorë, kanë ushtruar kontrolle për lokalizimin e shtetasit F. P., alias F. S., alias F. M., 41 vjeç, dhe vijon puna për kapjen e këtij shtetasi i cili është shpallur në kërkim ndërkombëtar.
Pesë vjet më parë, në vitin 2019, Floriani u vu në pranga, ndërsa njihet ndryshe si kreu i një bande që me gomone niste kanabis nga Shqipëria në Brindizi. Droga nëpërmjet korrierëve shpërndahej nga Puglia drejt Romës, Napolit, Milanos dhe Firenzes. Anëtarë e bandës ishin Armand Lushaj, Indrit Hamzaj dhe Julian Aliaj, raportohej asokohe në mediat italiane.
Në një kohë që është shpallur në kërkim ndërkombëtar dhe po punohet për arrestimin e atentatorit, i njohur me pseudonimin ‘Pole Qorri’, policia e Vlorës ka kryer kontrolle në disa vende si dhe në banesë, por nuk është gjetur. Dyshohet se është në Dubai.
Sa i takon vrasjes së 15 Marsit, Policia arrestoi në flagrancë Ilir Beqaraj alias Ilir Brahimi, alias Ilir Mançellari, 41 vjeç dhe Edison Haxhiun, 30 vjeç, si të dyshuar për ekzekutimin e ish-punonjësit të policisë.
Ndaj Ilir Beqarajt, i arrestuar më parë për ‘Armëmbajtje pa leje’ dhe ‘Falsifikimi i dokumenteve’, prokuroria e Tiranës ka bërë rikualifikimin e veprës penale, duke shtuar ndaj tij edhe veprën penale për ‘Vrasje me Paramendim’. Ndërsa Edison Haxhiu, akuzohet për ‘Sigurimi i kushteve dhe mjeteve materiale për të kryer vrasje’./Radar.al