Një 20-vjeçar nga Kamza ka përfunduar në prangat e Policisë së Tiranës, pasi dyshohet se ka mbajtur dhe përdorur në mënyrë të paligjshme uniformën e Policisë së Shtetit, duke u prezantuar në publik si efektiv i rendit.
Gjatë një kontrolli në bulevardin “Nënë Tereza”, patrulla e Komisariatit Nr. 5 ndaloi një automjet tip “Mercedes-Benz”, drejtuar nga shtetasi E. B., 20 vjeç, i cili ishte i veshur me uniformë dhe stema të ngjashme me ato të Policisë.
Pas verifikimeve, rezultoi se i riu nuk kishte asnjë lidhje me strukturat e Policisë së Shtetit. Gjatë kontrollit në banesën e tij, u gjetën dhe sekuestruan materiale të shumta që përdoreshin për t’u maskuar si punonjës policie:
4 dokumente identifikimi me emra dhe foto të dyshuara si të falsifikuara;
1 armë sportive e tipit pistoletë me 2 krehra;
Uniformë policie, 16 stema dhe grada të ndryshme;
3 kapele me shenja policore.
Policia ka nisur hetimet për të zbuluar nëse 20-vjeçari ka qenë i përfshirë në veprimtari të tjera të paligjshme duke përdorur identitetin fals të efektivit të rendit.
Në përfundim të veprimeve, E. B. u arrestua në flagrancë dhe materialet procedurale iu referuan Prokurorisë së Tiranës për veprime të mëtejshme.