Në Komisionin e Ekonomisë dhe Financave, deputetët e opozitës dhe mazhorancës akuzuan Autoritetin e Konkurrencës për mungesë transparence dhe për mosdhënie të një vendimi përfundimtar lidhur me hetimet për paketat që ofrojnë spitalet private në tregun e shërbimeve shëndetësore.
Deputeti socialist Erion Braçe u ndal te Spitali Amerikan, duke e akuzuar për pozitë dominuese në treg dhe për shtrirje të ndikimit në fondet publike përmes koncesioneve dhe partneriteteve publike-private.
“Për tregun e shërbimeve shëndetësore private. Ka kirurgji në spitale private. Shërbim me këtë produkt. Është e mundur për t’u hetuar abuzim me pozitën dominuese në treg. Këtë shërbim e dominon një operator i vetëm i cili po integrohet për shkak të parave që akumulon dhe në shërbime të tjera.
Edhe në koncesione dhe në PPP dhe në farmaceutikë. Po zgjerohet edhe akoma më shumë. Dhe shifrat që dëgjohen nga njerëz që shkojnë e paguajnë janë marramendëse. Më mirë shkon në Stamboll sesa të ikësh atje,” — deklaroi deputeti i PS, Erion Braçe.
Kreu i Autoritetit të Konkurrencës, Denar Biba, pranoi se hetimi nuk ka qenë i plotë për shkak të mungesës së informacionit, duke theksuar se pavarësisht çmimeve të larta, nuk janë gjetur prova për abuzim me pozitën dominuese.
“Disa prej shërbimeve shumë të rëndësishme jepen ekskluzivisht nga disa spitale private, definitivisht jo të përballueshme. Dërguam pyetje edhe në rajon për të krahasuar çmimet, nuk na kthyen përgjigje. Më pas arritëm të gjenim disa benchmarke për çmimet, por jo për kostot.
Në këtë pikë ju drejtuam të hetuarve: na bëni analiza të kostos. Analiza e tyre e kostos ishte që fitimi i tyre ishte 3%. Me fitime të tilla, s’ka abuzime me pozitën dominuese,” — u shpreh Denar Biba.
Debati në komision u zgjerua edhe për tregje të tjera, ku deputetë të PS dhe PD ngritën shqetësime për mungesë konkurrence dhe abuzime në fusha si pikat e grumbullimit, kompanitë celulare dhe karburantet.
Deputeti i PD-së Eno Bozdo iu referua raportit të Departamentit Amerikan të Shtetit, duke theksuar problemet me mjedisin ekonomik në Shqipëri:
“Këtë klimë kaq të rëndë të gjendjes së konkurrencës e ka përcaktuar dhe Departamenti Amerikan i Shtetit, ku përcakton mjedisin ekonomik si të korruptuar dhe problematik.
80 milionë euro janë prokurime publike që kanë përfunduar me flamur të kuq dhe me një ofertues të vetëm,” — deklaroi Bozdo.
Nga ana tjetër, Erion Braçe kërkoi që Autoriteti të përfundojë hetimet në kohë, pasi edhe inflacioni apo mbiçmimi i lekut ndikojnë në treg:
“Hetimi i tregut të produkteve është shumë i rëndësishëm. Sa kohë keni për të përmbushur këtë hetim? Qoftë dhe inflacioni apo mbiçmimi i lekut ka ndikim në këtë treg. E rëndësishme është koha e përfundimit të hetimit tuaj,” — tha Braçe.
Edhe deputeti demokrat Xhelal Mziu ngriti shqetësimin për tarifat e larta të telefonisë celulare dhe çmimet e karburanteve në vend:
“Telefonia celulare, kemi tarifa jashtëzakonisht të larta. Kemi kërkuar dhe nga vetë autoriteti juaj, është ai që duhet të ndërhynte.
Ne prodhojmë karburant, jemi favorizuar për shkak të portit, por ne vazhdojmë të kemi çmimin më të shtrenjtë edhe në raport me rajonin,” — theksoi Mziu.
Në përgjigje, Denar Biba komentoi se situata në tregun celular nuk është unike për Shqipërinë:
“Fenomeni në dukje është vetëm në Shqipëri. Anglia nga 4 në 3 kompani telefonike,” — tha Biba.
Ndërsa deputetët flasin për monopol, mungesë transparence dhe mospërgjegjshmëri, kreu i Autoritetit të Konkurrencës premtoi vendime më të shpejta në të ardhmen:
“Le të shpresojmë se kemi nxjerrë disa leksione. Vendimet do të jenë të shpejta,” — përfundoi Biba.