Një shqiptar vendas dhe një turist gjerman janë shpëtuar pas një rasti helmimi në malin e Korabit, pasi kishin konsumuar aksidentalisht një bimë helmuese. Ngjarja ndodhi në një zonë të thellë malore, ku të dy personat u ndjenë keq brenda pak minutash.
Shërbimi i Kërkim-Shpëtimit Malor i Kosovës bëri të ditur se njëri prej tyre arriti të lajmërojë autoritetet dhe të dërgojë koordinatat e vendndodhjes. Dy anëtarë të këtij shërbimi ndodheshin pranë zonës dhe dhanë ndihmën e parë, por për shkak të gjendjes së rënduar u kërkua evakuim ajror.
Autoritetet shqiptare ndërhynë menjëherë me helikopter dhe ekip mjekësor, duke i transportuar të helmuarit në Qendrën Spitalore Universitare në Tiranë, ku po marrin trajtim të specializuar. Gjendja e tyre raportohet e stabilizuar.