Ramush Haradinaj ka dhënë dorëheqje nga posti i kryetarit të Aleancës për Ardhmërinë e Kosovës, duke njoftuar se nuk do të rikandidojë në zgjedhjet e brendshme të partisë.
Vendimin e bëri publik gjatë mbledhjes së Këshillit të Përgjithshëm të AAK-së, ku sqaroi edhe arsyet e tërheqjes nga drejtimi i partisë.
“Procesi zgjedhor fillon nga 20 shkurti. Është risi ose ndryshim sepse nuk do të kandidoj për kryetar të Aleancës në këto zgjedhje të brendshme. Një arsye është koha e gjatë, arsyeja e dytë është rezultati zgjedhor. Po ashtu është edhe besimi që kam në kuadrin e Aleancës”, u shpreh Haradinaj.
Ai theksoi se beson në kapacitetet e strukturave të partisë për ta çuar përpara AAK-në në një fazë të re.
Ndërkohë, Haradinaj hodhi poshtë zërat se po synon postin e presidentit të Kosovës. Ai deklaroi se nuk është kandidat për këtë funksion, duke lënë megjithatë të hapur mundësinë e një shqyrtimi nëse do të kishte një kërkesë nga deputetët.
“Nuk jam kandidat për president të vendit. Nëse në një rrethanë të caktuar deputetët, Parlamenti do të ma kërkonin, do ta shqyrtoja, por aktualisht nuk jam kandidat. Ende nuk kemi një qëndrim se si do të veprojmë rreth çështjes së presidentit”, tha ai.
Dorëheqja e Haradinajt shënon një zhvillim të rëndësishëm në skenën politike të Kosovës, ndërsa AAK pritet të hyjë në një proces të ri zgjedhor brenda strukturave të saj.