Pas një periudhe 7-mujore pune, Tuneli i Llogarasë është rihapur këtë të shtunë, duke lehtësuar ndjeshëm qarkullimin drejt jugut të Shqipërisë. Prej orës 09:00 të mëngjesit, qytetarë të shumtë dhe automjete janë pozicionuar në hyrje të tunelit, për të kaluar për herë të parë në një nga veprat më moderne infrastrukturore të vendit.
Tuneli do të jetë i aksesueshëm falas për të gjithë përdoruesit gjatë sezonit turistik veror, deri më 15 shtator.
Me një gjatësi prej 5.9 kilometrash, ai shkurton kohën e udhëtimit nga Dukati në Palasë nga 30 minuta në vetëm 7 minuta, duke ofruar një rrugë më të shpejtë, më të sigurt dhe më komode për turistët dhe banorët vendas.
Struktura përbëhet nga dy tunele: tuneli kryesor dhe ai i emergjencës, të cilët janë të lidhur me 11 tunele ndërlidhëse përgjatë gjithë gjatësisë së tyre. Shpejtësia maksimale e lejuar në tunel është 80 km/h.