Pas sulmit ajror të ndërmarrë nga Irani ndaj Izraelit, 40 persona po trajtohen në spitalet izraelite, ndërsa dy prej tyre ndodhen në gjendje kritike.
Sipas BBC, në spitalin Ichilov të Tel Avivit po marrin ndihmë mjekësore 18 pacientë. Në spitalin Beilinson në Petah Tikva po trajtohen 7 të plagosur, përfshirë një në gjendje të rëndë, ndërsa spitali Sheba në Ramat Gan ka pranuar 15 të tjerë, mes tyre një pacient në gjendje kritike.
Sulmi, i quajtur nga Irani “Premtimi i Vërtetë”, u krye nga Garda Revolucionare dhe synoi “dhjetëra objekte ushtarake dhe baza ajrore izraelite”, si përgjigje ndaj sulmeve ajrore të Tel Avivit mbi objektiva në territorin iranian.
Udhëheqësi Suprem iranian, Ali Khamenei, paralajmëroi se Izraeli do të përballet me “goditje të rënda”, ndërsa kryeministri izraelit Benjamin Netanyahu theksoi se lufta nuk është me popullin iranian, por me regjimin që, sipas tij, ka nisur përshkallëzimin.