Dhomat e Specializuara të Kosovës (DhSK) në Hagë kanë vendosur të vazhdojnë masën e paraburgimit ndaj ish-liderëve të UÇK-së Kadri Veseli, Rexhep Selimi dhe Jakup Krasniqi, të cilët bashkë me Hashim Thaçin akuzohen për krime lufte dhe krime kundër njerëzimit.
Sipas vendimeve të publikuara më 18 shtator 2025, Prokuroria ka argumentuar se ekziston rreziku që të akuzuarit t’i ikin drejtësisë, të kryejnë krime të tjera ose të pengojnë procesin gjyqësor. Trupi gjykues, i kryesuar nga gjyqtari Charles Smith III, vlerësoi se nuk ka prova të mjaftueshme që të justifikojnë një ikje të tyre, por theksoi rrezikun e pengimit të drejtësisë dhe ndikimit mbi dëshmitarët.
Si pasojë, Veselit, Selimit dhe Krasniqit u vazhdohet paraburgimi deri në përfundimin e hetimeve dhe procesit gjyqësor.
Procesi i mbrojtjes ka nisur më 15 shtator me dëshmitë e ish-ndihmësit të sekretarit amerikan të Shtetit, James Rubin, dhe më pas Paul Williams. DhSK-ja ka caktuar datën 14 nëntor 2025 për përfundimin e çështjes së mbrojtjes, ndërsa parashtresat përfundimtare të procesit dhe deklaratat mbi ndikimin e krimeve të pretenduara tek viktimat pritet të dorëzohen deri më 22 dhjetor 2025.
Në këtë rast, Prokuroria ka përfunduar paraqitjen e provave më 15 prill 2025, ndërsa mbrojtja kishte paraqitur kërkesë sipas Rregullës 130 për rrëzimin e akuzave në aktakuzë, kërkesë që u rrëzua nga trupi gjykues më 16 korrik 2025.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit, e dorëzuar fillimisht më 9 nëntor 2020 dhe e konfirmuar më 26 tetor 2020, përmban dhjetë pika që i ngarkojnë ata për krime lufte dhe krime kundër njerëzimit, përfshirë incidente në Gjilan, Budakovë dhe Semetishtë.