Një botim i datës 18 korrik nga gazeta zyrtare e Ministrisë së Mbrojtjes shqiptare, “Ushtria”, ka ngjallur reagime në mediat greke, pas publikimit të një harte historike që lidhej me periudhën e Kongresit të Berlinit të vitit 1878.
Gazeta greke “Protothema” ka reaguar ashpër, duke e interpretuar këtë hartë si një paraqitje të asaj që ajo e quan “Shqipëria e Madhe”, që sipas saj përfshin territore përtej kufijve të sotëm të Shqipërisë – nga Epiri e deri në ishullin e Korfuzit. Artikulli grek vë në dukje se kjo hartë është shfaqur në një faqe të një botimi zyrtar shtetëror shqiptar, gjë që e bën edhe më shqetësues për ta mesazhin që përcillet.
Në shkrimin e “Ushtria”, bëhej një trajtim historik për vendimet e Kongresit të Berlinit dhe ndikimin e tyre në kufijtë e territoreve shqiptare të asaj kohe, por për mediat greke, ky botim nënkupton një pretendim territorial, duke rikthyer tensionin mbi çështjet e ndjeshme historike mes dy vendeve.
“Protothema” shkon më tej duke kontestuar ekzistencën e vetëdijes kombëtare shqiptare në vitin 1878, duke hedhur akuza për ndërtimin e një shteti që sipas saj u imponua nga interesa të huaja. Po ashtu, media greke rikujton edhe botime të mëparshme të gazetës “Ushtria”, ku janë trajtuar tema të tjera të debatueshme, përfshirë dhe përmendjen e “gjenocidit grek kundër çamëve myslimanë”.
Pas publikimit të hartës, disa portale të vogla greke e ngritën çështjen, dhe menjëherë pas kësaj duket se reagimi ka mbërritur edhe në institucionet shqiptare: numri i datës 18 korrik nuk është më i qasshëm në faqen zyrtare të Ministrisë së Mbrojtjes. Një kërkim në faqen online nuk gjen asnjë gjurmë të tij.
Ende nuk ka një deklaratë zyrtare nga ministri i Mbrojtjes, Piro Vëngu, për këtë situatë. Kujtojmë se Vëngu, i cili ka mbajtur detyra të rëndësishme në politikën e jashtme shqiptare në të kaluarën, është përmendur shpesh edhe për lidhjet e tij familjare me Greqinë, përfshirë posedimin e një pasaporte greke.
Ky episod ka risjellë në vëmendje tensionet historike në marrëdhëniet mes Shqipërisë dhe Greqisë, në një moment kur pritej një klimë më e qetë dhe bashkëpunuese ndërmjet dy vendeve.
