Qeveria greke njoftoi sot se ka siguruar një marrëveshje me Gjermaninë dhe vendet e tjera të Bashkimit Evropian, sipas së cilës nuk do të jetë e detyruar të marrë mbrapsht azilkërkuesit deri në hyrjen në fuqi të sistemit të reformuar evropian të azilit.
“Sipas marrëveshjes, azilkërkuesit që kanë hyrë në Greqi në mënyrë të parregullt dhe më pas kanë udhëtuar drejt një vendi si Gjermania para 12 qershorit 2026 nuk do të kthehen në Greqi”, deklaroi Ministria greke për Migracionin dhe Azilin. Rreth 515,000 raste të Dublinit – përfshirë mbi 100,000 nga katër vitet e fundit – nuk do të transferohen në mënyrë retroaktive.
Megjithatë, transferimet sipas sistemit të Dublinit do të fillojnë gjashtë muaj pasi vendi pritës pranon të marrë përgjegjësinë për një individ të caktuar. Kjo do të thotë se shumë azilkërkues tashmë mbeten përgjegjësi e vendeve pritëse dhe nuk mund të kthehen më në Greqi.
Ministri i Brendshëm gjerman, Alexander Dobrindt, pasi takoi homologët e tij nga Greqia dhe Italia në Bruksel, konfirmoi se është arritur dakordësi për kthimin e emigrantëve që kanë hyrë në BE përmes këtyre vendeve, duke theksuar rëndësinë e koordinimit ndërmjet vendeve anëtare.
Procedura e Dublinit parashikon që vendi i parë në të cilin refugjati hyn në BE është përgjegjës për shqyrtimin e kërkesës së tij për azil. Marrëveshja e re pritet të sigurojë një tranzicion më të qetë drejt sistemit të ri evropian të azilit, pa detyrime retroaktive për Greqinë.