Gjykata e Lartë ka rrëzuar rekursin e ish-kryetarit të Bashkisë së Kukësit, Safet Gjici, i cili kërkonte shpalljen e pafajësisë. Vendimi lë në fuqi dënimin e dhënë më herët nga Apeli i Posaçëm, i datës 24 qershor 2024, për veprat penale “shpërdorim detyre” dhe “korrupsion pasiv”.
Gjici, i arrestuar fillimisht nën akuzën se kishte favorizuar Alma Kaçin në një projekt për strehimin e qenve endacakë në Kukës, u dënua nga Shkalla e Parë më 7 shkurt 2024 me 3 vite burg, të reduktuara në 2 vite pas gjykimit të shkurtuar.
Më 19 maj 2024, për shkak të problemeve shëndetësore, ai u lirua nga qelia dhe ndodhet aktualisht në “arrest shtëpie”.
Ky vendim i Gjykatës së Lartë shënon përfundimin e përpjekjes ligjore të Safet Gjicit për të shmangur dënimin penal.