Gjeneral-lejtnant Gerald Funke, shefi i ushtrisë gjermane, ka paralajmëruar se Rusia mund të ndërmarrë një sulm ndaj vendeve të NATO-s brenda dy deri në tre viteve të ardhshme, duke e vendosur Gjermaninë në qendër të çdo skenari të mundshëm konflikti.
Sipas Funke-s, sfida kryesore në një situatë lufte do të ishte logjistika, pasi dhjetëra mijëra trupa aleate do të duhej të zhvendoseshin drejt vijave të kontaktit në kushte ku rrugët kryesore dhe linjat hekurudhore mund të goditen nga sabotime, sulme kibernetike apo raketa ruse.
“Është jetike që Gjermania të mbetet një qendër logjistike funksionale. Duhet të sigurohemi që, nëse një linjë furnizimi bie, të kemi alternativa të gatshme për ta zëvendësuar,” u shpreh Funke.
Një tjetër problem serioz, sipas tij, është menaxhimi i numrit të madh të të plagosurve. Bundeswehr aktualisht operon pesë spitale ushtarake me rreth 1,800 shtretër, kapacitet që mund të mbingarkohet shumë shpejt në rast konflikti të gjerë.
Për këtë arsye, Komanda e Përbashkët e Mbështetjes dhe Ministria Federale e Shëndetësisë kanë ndarë rrjetin e spitaleve civile në katër zona, të cilat mund të vihen në dispozicion për trajtimin e të plagosurve në rast krize.
“Ndryshe nga Afganistani, ku numri i të plagosurve ishte i lartë por i menaxhueshëm, tani duhet të planifikojmë për skenarë me deri në 1,000 të plagosur në ditë. Sa më thellë e analizon, aq më kompleks bëhet realiteti,” theksoi ai.
Komanda e drejtuar nga Funke, e krijuar pas riorganizimit të madh të ushtrisë gjermane vitin e kaluar, po zhvillon një version modern të sistemit të epokës së Luftës së Ftohtë, që parashikon rekuizicionimin masiv të mjeteve transportuese, furnizimeve dhe personelit.
Gjenerali ka nënshkruar gjithashtu marrëveshje gatishmërie me Deutsche Bahn, operatorin kombëtar hekurudhor, për të garantuar që trenat për transport ushtarak të mund të vihen në funksion brenda tre ditëve nga njoftimi.
Një pengesë tjetër mbetet kuadri ligjor i Gjermanisë, pasi disa masa ushtarake mund të aktivizohen vetëm me miratimin e dy të tretave të Bundestagut, përmes shpalljes së “gjendjes së tensionit” ose “gjendjes së mbrojtjes kombëtare”.
Funke paralajmëroi se ky proces mund të komplikohet nga fakti që më shumë se një e treta e vendeve në parlament mbahen nga parti të krahut të majtë dhe të djathtë ekstrem, të konsideruara miqësore ndaj Rusisë.
Analistët vlerësojnë se Gjermania mund të ketë vështirësi në kalimin e shpejtë nga paqja në krizë, ndërsa Funke theksoi se ndarja tradicionale mes paqes dhe luftës është një koncept i vjetëruar, i sfiduar sot nga lufta moderne hibride.