Një zhvillim i fortë financiar në Hungari mund të ketë pasoja edhe në tregun shqiptar të telekomunikacionit. Qeveria e re hungareze, e drejtuar nga Péter Magyar, po rishikon një aplikim për kredi prej 16 miliardë eurosh nga Komisioni Europian, duke ngritur shqetësime për rreziqe korrupsioni.
Paketa financiare, e cila parashikonte kredi me interesa të ulëta për sektorin e mbrojtjes, ishte aplikuar nga ish-qeveria e Viktor Orbán. Megjithatë, pas lançimit të saj, një pjesë e konsiderueshme e industrisë së mbrojtjes në vend u privatizua nga 4iG, në procese që tashmë janë nën hetim.
Sipas mediave hungareze, pikërisht 4iG pritej të ishte një nga përfituesit kryesorë të këtyre fondeve. Bllokimi i kredisë nga qeveria aktuale lidhet kryesisht me këtë kompani, e cila shpesh është konsideruar e afërt me qeverisjen e mëparshme.
Raportime nga media si “kontroll.hu” sugjerojnë se për shkak të këtij vendimi dhe hetimeve në vazhdim, 4iG mund të përballet me vështirësi serioze financiare, deri në rrezik falimentimi.
Zhvillimet ndikojnë drejtpërdrejt edhe në One Albania, e cila është në pronësi të 4iG. Ekspertët paralajmërojnë se pasiguria financiare dhe reputacioni i dëmtuar i grupit mund të reflektohen në operacionet dhe stabilitetin e kompanisë në Shqipëri.
Grupi 4iG tashmë përballet jo vetëm me sfida financiare për shkak të mungesës së fondeve, por edhe me rreziqe ligjore, pasi qeveria hungareze ka paralajmëruar hetime të thelluara për procedurat e privatizimit dhe lidhjet e mundshme me korrupsionin.
Këto zhvillime vendosin në pikëpyetje të ardhmen e investimeve dhe ndikimin e tyre në tregjet ku operon grupi, përfshirë edhe Shqipërinë.