Autoritetet në New Mexico kanë intensifikuar hetimet për të zbardhur përmasat e abuzimeve seksuale të dyshuara të kryera nga Jeffrey Epstein në fermën e tij të izoluar, e njohur si “Zorro Ranch”.
Sipas raportimeve, disa gra pretendojnë se janë dërguar në këtë pronë dhe janë shfrytëzuar seksualisht nga Epstein dhe bashkëpunëtorët e tij ndër vite. Deri më tani, vetëm një viktimë nga kjo zonë, Rachel Benavides, ka dalë publikisht me akuza.
Përfaqësuesja Marianna Anaya, e cila drejton hetimin shtetëror për këtë çështje, konfirmoi se autoritetet janë kontaktuar nga banorë lokalë që pretendojnë se janë abuzuar në fermë. Ajo bëri të ditur se një komision i posaçëm po bashkëpunon me Departamenti i Drejtësisë i SHBA për të ndihmuar të mbijetuarit të kërkojnë drejtësi.
Ky është rasti i parë që ky komision pranon zyrtarisht se është kontaktuar nga gra vendase që pretendojnë abuzime gjatë rreth 25 viteve që Epstein zotëronte pronën.
Sipas dokumenteve gjyqësore, Epstein dhe bashkëpunëtorët e tij akuzohen se kanë joshur vajza adoleshente nga zona të ndryshme drejt pronave të tij në New York City dhe Palm Beach, ku dyshohet se janë kryer abuzime.
Ndërkohë, Maria Jose Rodriguez Cadiz, që udhëheq një qendër mbështetëse për viktimat e krimeve seksuale, deklaroi se vetëm në vitin 2019—kur Epstein u arrestua dhe më pas u gjet i vdekur në qelinë e tij—rreth 45 persona iu drejtuan qendrës për ndihmë dhe informacion lidhur me abuzimet e dyshuara në fermë.
Hetimet vijojnë, ndërsa autoritetet synojnë të hedhin dritë mbi një nga skandalet më të rënda të abuzimit seksual në SHBA.