Pas publikimit të një artikulli nga “Bloomberg”, kryeministri Edi Rama reagoi fuqishëm përmes rrjetit X, duke mohuar lajmet sipas të cilave Shqipëria do të paguajë 1 miliardë dollarë për të marrë pjesë në Bordin e Paqes së Presidentit Trump dhe se Palestinezët do të transferohen në vendin tonë.
Rama i cilësoi këto si “gënjeshtra” dhe kritikoi ashpër mediat dhe aktorët politikë që, sipas tij, përhapin dezinformim për interesat e tyre. Kryeministri theksoi se pjesëmarrja e Shqipërisë në Bordin e Paqes përfaqëson një nder dhe një rritje të statusit ndërkombëtar të vendit, duke e quajtur këtë një “Shqipëri Tjetër, e dinjitetshme dhe e respektuar botërisht”.
Ai shtoi se për të personalisht rëndësi ka vetëm besimi i qytetarëve shqiptarë, që e kanë zgjedhur katër herë si kryeministër, si dhe respekti i liderëve ndërkombëtarë. Në reagimin e tij, Rama përdori metaforën: “sa më shumë lehin qentë, aq më përpara është duke shkuar karvani”, duke aluduar se kritikat dhe lajmet e rreme nuk pengojnë avancimin e vendit në arenën ndërkombëtare.
Në këtë mënyrë, kryeministri ka sqaruar pozicionin e tij dhe të qeverisë lidhur me ftesën e Shqipërisë në Bordin e Paqes, duke mohuar çdo lidhje me shpenzime të konsiderueshme financiare apo lëvizje të popullsisë palestineze.