Një aksident i rëndë hekurudhor ka ndodhur mbrëmjen e sotme në Sllovaki, ku dy trena janë përplasur ‘kokë më kokë’, duke shkaktuar shumë të lënduar.
Policia njoftoi përmes mediave sociale se në orën 19:31, në linjën hekurudhore 158, është raportuar për një përplasje midis dy trenave në seksionin Pezinok–Bratislavë.
Sipas mediave lokale, treni REX 1814, që udhëtonte në linjën Nitra–Bratislavë, u përplas ballë për ballë me trenin Ex 620 pak minuta pasi ishte larguar nga stacioni Pezinok. Raportimet paralajmërojnë për dhjetëra të lënduar nga goditja e fortë.
Shërbimet e emergjencës dhe ekipet e shpëtimit ndodhen në vendngjarje, ndërsa zona midis Bratislavës dhe Pezinokut, rreth 20 kilometra në verilindje të kryeqytetit, është bllokuar për qarkullimin hekurudhor.
Kompania Hekurudhore Sllovake (ZSSK) deklaroi se aksidenti do të hetohet në detaje, ndërsa shkaqet e përplasjes mbeten ende të paqarta. Më shumë informacione pritet të publikohen sapo të jetë e mundur nga autoritetet hetimore.