Pas pushimit veror, Formula 1 rikthehet këtë fundjavë për Çmimin e Madh të Holandës dhe Ferrari është gati të vazhdojë rrugën e progresit.
Gara e fundit në Hungari nisi mirë por përfundoi zhgënjyese, ndaj objektivi tani është të mbahen rezultatet pozitive që janë shfaqur në eventet e fundit. “Rikthehemi në pistë pas pushimit, i cili i dha skuadrës dhe pilotëve mundësinë të rifreskohen për një fazë përfundimtare shumë intensive të sezonit”, u shpreh Frederik Vasër, drejtuesi i Ferrarit, i cili më tej vijoi: “Në Holandë synojmë të vazhdojmë trendin pozitiv të ndërtuar së fundmi, pasi kemi parë përmirësime të qarta në aspektin e konkurrueshmërisë”.
ZANDVORT, PISTË UNIKE Zandvort është një nga pistat më të veçanta në kalendar. E gjatë 4.259 metra dhe me 72 xhiro, ky cirkuit është ndërtuar mbi rërë dhe shpesh ndikohet nga era që sjell rërë në asfalt, duke ulur ngjitjen dhe duke e bërë pilotimin më sfidues. Pista është e njohur për dy kthesat me pjerrësi të lartë – Hugenholtzbocht (kthesa 3) dhe Arie Luyendykbocht (kthesa 14) – me një pjerrësi prej 19° dhe 18°, që u lejon pilotëve të kalojnë me shpejtësi të lartë. Një tjetër pikë kyçe është Tarzanbocht (kthesa 1) – një kthesë e mprehtë djathtas në fund të pjesës së drejtë të shpejtësisë, një nga të paktat vende ku sistemi DRS mund të përdoret për parakalime.
Zandvort kërkon një balancë të mirë aerodinamike dhe menaxhim të saktë të gomave, për shkak të asfaltit të vështirë. Me pistën e ngushtë dhe kthesa të shumta, kualifikueset janë vendimtare. Për këtë arsye, Ferrari do të përqendrohet që në sesionet e para për të siguruar një pozicion të favorshëm në start. Pista ka dy zona DRS, një në pjesën e drejtë kryesore, që mund të aktivizohet që nga kthesa e fundit parabolike, dhe tjetra mes kthesave 10 dhe 11./PanoramaSport