Matt Whitaker, ambasadori i Shteteve të Bashkuara të Amerikës në NATO, ka zhvilluar një vizitë në Shqipëri, ku ka inspektuar nga afër Baza Ajrore e Kuçovës.
Ai u shoqërua gjatë kësaj vizite nga ministri i Mbrojtjes, Ermal Nufi, me të cilin diskutoi mbi rolin strategjik të Shqipërisë në rajon.
Sipas njoftimit të Ambasadës amerikane në Tiranë, gjatë fluturimit mbi bazën e rinovuar me fonde të NATO-s, u diskutua për potencialin e vendit për t’u kthyer në një nyje logjistike të aleancës, si dhe për rëndësinë e investimeve në Korridori VIII.
Po ashtu, në fokus të bisedimeve ishte edhe rritja e kapaciteteve mbrojtëse dhe kontributi i Shqipërisë në forcimin e sigurisë rajonale përmes shtimit të investimeve në fushën e mbrojtjes.
“Duke fluturuar mbi Bazën Ajrore të Kuçovës, e rinovuar përmes fondeve të NATO-s, Ambasadori i Shteteve të Bashkuara në NATO, Matthew Whitaker, dhe Ministri i Mbrojtjes, Ermal Nufi, diskutuan aftësinë e Shqipërisë për t’u bërë një nyje logjistike e NATO-s në rajon përmes investimeve në Korridorin VIII, si dhe mënyrat se si Shqipëria mund ta çojë sigurinë rajonale në nivele më të larta përmes rritjes së shpenzimeve në fushën e mbrojtjes.”, bën me dije Ambasada amerikane në Tiranë.
