Ka përfunduar procesi i numërimit të votave preferenciale në bashkinë e Pogradecit, ku kandidati i Partisë Socialiste, Bledi Çomo, ka dalë fitues me 8399 vota, duke lënë pas me një diferencë të thellë kandidatin demokrat Gentian Çela, i cili siguroi vetëm 2880 vota.
Menjëherë pas shpalljes së rezultatit, mbështetësit e Çomos shpërthyen në brohorima dhe duartrokitje, duke festuar fitoren e thellë të socialistëve në këtë bashki të rëndësishme.
Vetë Bledi Çomo, në një mesazh pas fitores, falënderoi qytetarët e Pogradecit për besimin dhe mbështetjen:
“Faleminderit të gjithë banorëve të Pogradecit, i love you Pogradeci! Do të jem zëri juaj në Kuvend. Ky është një rezultat i mrekullueshëm që reflekton besimin te Partia Socialiste dhe puna e palodhur e strukturave tona.”
Fitorja e Çomos konsiderohet një sinjal i fortë politik për dominimin e PS-së në qarkun e Korçës dhe një konfirmim i mbështetjes popullore për përfaqësimin e ri në Parlament.