Më pak se dhjetë ditë para startit të Botërorit të Klubeve, FIFA është detyruar të ulë në mënyrë drastike çmimet e biletave, mes shqetësimeve për pjesëmarrje të ulët në stadiume. Ndeshja hapëse mes Inter Miami dhe Al Ahly më 14 qershor, e cila pritej të tërhiqte turma falë pranisë së Lionel Messit, mund të zhvillohet përballë shumë sediljeve bosh në stadiumin “Hard Rock” të Miamit, me kapacitet 65 mijë vendesh.
Fillimisht, biletat për këtë ndeshje u shitën me çmime rreth 300 euro, por tani mund të gjenden për vetëm 48 euro, një ulje drastike me qëllim mbushjen e stadiumit. Edhe përballjet e tjera kanë pësuar të njëjtin fat: ndeshja Chelsea–Los Angeles FC në Atlanta më 16 qershor ka vende të lira nga 64 euro, ndërsa ajo mes Manchester City dhe Wydad AC në Filadelfia, më 18 qershor, nga 45 euro.
FIFA shprehet optimiste për pjesëmarrjen në këtë edicion të parë të turneut të reformuar. “Parashikojmë një interes të madh përgjatë gjithë garës,” thuhet në deklaratën zyrtare për The Athletic. Megjithatë, realiteti në terren mbetet i paqartë dhe 14 qershori do të jetë një test i rëndësishëm për suksesin e këtij formati të ri.