Reperi i njohur Noizy, i cili interpretoi këngën zyrtare të fushatës së Partisë Socialiste, ka deklaruar publikisht se vota e tij do të shkojë për PS-në dhe për kryeministrin Edi Rama.
Në një postim të gjatë në rrjetet sociale, ai rrëfeu se megjithëse familja e tij dikur mbështeste Partinë Demokratike, ai vetë ka kujtime jo të mira nga ajo periudhë dhe nuk dëshiron të rikthehet në atë kohë që e përshkruan si “errësirë e rrëmujë”.
“Personalisht nuk shoh programet e partive, sepse kushdo që fiton, unë mbetem i njëjti – punoj pa orar, fle pak, dhe luftoj për të arritur më shumë. Për mua, vendimtare është kush janë njerëzit që udhëheqin. E deri më sot, i vetmi që më ka bindur është Edi Rama,” shkruan ai.
Reperi komentoi edhe përplasjet e fundit mes protestuesve të opozitës, duke thënë se nuk u habit nga sjellja e tyre, dhe shtoi se “ndryshimi nuk ka kuptim pa përmirësim”.
“Deri sa dikush tjetër të më bindë, vota ime shkon për PS-në,” përfundoi ai.
