Aktorja e njohur Ema Andrea ka ndarë publikisht dhimbjen e saj pas vdekjes së vëllait të saj binjak, ish-basketbollistit Enea Andrea, i cili ndërroi jetë në fund të vitit 2025 pas një arresti kardiak.
Gjatë një interviste në emisionin “Goca & Gra”, Ema nuk mundi të mbante lotët teksa tregonte për momentin e vështirë që po kalon. Ajo përshkroi humbjen e vëllait si ndarjen e gjysmës së saj më të mirë dhe rrëfeu se ndihet si të jetojë në “dy dimensione”.
“Mua nuk më është mbyllur mirë 2025. Normal që nuk është e mirë as 2026. Kam humbur gjysmën time. Për momentin jetoj në dy dimensione, uroj që kjo mos të ndikojë në punë… Edhe pse e kam thënë me dy mendje ‘Po’, kur erdha dhe u takuam, u dakordësova me veten që të jem këtu dhe vetëm këtu mund ta filloja,” tha ajo.
Ema Andrea falënderoi gjithashtu publikun për mbështetjen e dhënë gjatë këtyre ditëve të vështira:
“Vëllai im është përcjellë si mbret. I them faleminderit të gjithë atyre që na kanë shkruar dhe janë munduar të na mbështesin në të gjitha format. Dhimbja s’ka etikë, as moral, as fjalor. Kam zbuluar që as fjalët s’janë të duhurat.”
Aktorja e përshkroi humbjen si një dhuratë të hidhur të jetës, por theksoi se ka ndjerë shumë dashuri dhe mbështetje nga njerëz të njohur dhe të panjohur, duke e bërë këtë periudhë të trishtë pak më të lehtë për t’u përballuar.