Një shtetas shqiptar i shpallur në kërkim ndërkombëtar është ekstraduar nga Gjermania drejt Shqipërisë, në kuadër të operacionit ndërkombëtar të koduar “The Wanted”.
Interpol Tirana bëri të ditur se, pas bashkëpunimit me Interpol Wiesbaden, u finalizua ekstradimi i shtetasit Sokol Ndreka, 51 vjeç, i dënuar nga Gjykata e Shkallës së Parë e Juridiksionit të Përgjithshëm Tiranë me 6 vite burgim për veprat penale “Ndihma për kalim të paligjshëm të kufijve” dhe “Largimi i të burgosurit nga vendi i qëndrimit”.
Ndreka ishte shpallur në kërkim ndërkombëtar pas vendimit të dhënë në vitin 2024.
Hetimet ndaj tij lidhen me një ngjarje të ndodhur më 31 tetor 2022, kur në rrugën dytësore Tiranë–Durrës policia ndaloi një automjet në të cilin u gjetën 15 shtetas të huaj, emigrantë të paligjshëm. Nga verifikimet rezultoi se Ndreka ishte i përfshirë në aktivitetin e trafikimit të emigrantëve.
Falë bashkëpunimit mes autoriteteve shqiptare dhe atyre gjermane, u bë i mundur lokalizimi, arrestimi dhe ekstradimi i tij në Shqipëri, për vuajtjen e dënimit të dhënë nga drejtësia shqiptare.