Ministri i Ekonomisë, Kulturës dhe Inovacionit, Blendi Gonxhja, njëherazi kandidat për deputet në Qarkun e Tiranës, ka shpjeguar mënyrën sesi është organizuar fushata e Partisë Socialiste në kryeqytet. I ftuar në emisionin “Open” në News24, ai theksoi se në radhët e PS është vendosur një rregull i qartë për të shmangur zhurmat në rrugë dhe prishjen e rendit vizual publik përmes posterash dhe mesazhesh të shumta të kandidatëve.
“Ne kemi vënë një rregull brenda PS që ne nuk do të bëjmë zhurmë në rrugë, si të themi një kaos me dizajn grafik me fytyra dhe mesazhe të secilit. Jemi kundër kësaj kakofonie që mund të bëhej një problem shqetësues për të përçuar mesazhin”.
Ministri shtoi se brenda organizatës janë përcaktuar qartë rregulla për koordinimin e aktiviteteve publike, në mënyrë që çdo veprimtari elektorale të jetë e miratuar dhe e harmonizuar me drejtuesin politik të njësisë përkatëse.
“Takimet publike të mëdha nuk mund të bëhen në një njësi tjetër pa u koordinuar me drejtuesin politik të asaj zone. Kjo për të shmangur ndarjen e energjisë në mënyrë individuale dhe për të funksionuar si një formacion i organizuar politik,” sqaroi ai.
Procesi i rindërtimit në Kombinat – Gonxhja: 85% e punës ka përfunduar
Gjatë intervistës, Gonxhja ndaloi edhe te procesi i rindërtimit në zonën e Kombinatit, një ndër më të prekura nga tërmeti i vitit 2019. Ai tha se deri tani është përmbyllur rreth 85% e punës, duke e konsideruar këtë si një arritje të madhe për qeverinë.
“Jemi ndoshta vendi i vetëm që kemi ofruar zgjidhje falas për banorët, me shtëpi të reja. Për pjesën që ka qenë në pritje, janë mbështetur me bonuse qiraje. Është një model që duhet të reflektojmë dhe të jemi krenarë për të,” deklaroi ai.
Sipas tij, mungesa e një normaliteti në skenën politike shpesh e bën komunikimin e qartë të vështirë: “Ndonjëherë duket sikur flasim me veten, por ky proces i rindërtimit është një histori suksesi që flet vetë.” Ne nuk kemi një opozitë normale. Opozita jonë nuk është objektive, as racionale dhe lidhet me ta”, tha Gonxhja.