Historia e dashurisë mes yllit norvegjez Erling Haaland dhe partneres së tij, Isabel Haugseng Johansen, ka nisur shumë përpara se sulmuesi të shndërrohej në një nga futbollistët më të njohur në botë.
Të dy janë rritur në Bryne të Norvegjisë dhe kanë qenë pjesë e klubit lokal Bryne FK, ku hodhën hapat e parë në futboll. Pikërisht aty nisi edhe njohja e tyre, e cila me kalimin e viteve u shndërrua në një histori dashurie.
Në një intervistë, Isabel ka treguar me humor se në fillim kishte një pëlqim për një nga shokët e Haalandit, por gjithçka ndryshoi pasi e njohu më mirë vetë sulmuesin norvegjez.
Edhe Haaland ka folur për fillimet e marrëdhënies së tyre, duke zbuluar se gjithçka nisi nga një kontakt i hershëm dhe një mesazh që Isabel i kishte dërguar.
Përpara se të largohej nga futbolli, Isabel ishte gjithashtu lojtare e Bryne FK. Ajo konsiderohej një futbolliste e shpejtë në fushë, një cilësi që e ndante edhe me partnerin e saj. Më pas vendosi të largohej nga sporti për t’iu përkushtuar jetës familjare.
Çifti e mbajti lidhjen larg syrit të publikut për disa vite, ndërsa e konfirmoi zyrtarisht vetëm në vitin 2023. Sot ata bëjnë një jetë të qetë, larg ekspozimit të tepërt mediatik, duke shijuar kohën së bashku përmes aktiviteteve të përditshme si gatimi apo video-lojërat.
Në dhjetor të vitit 2024, Haaland dhe Isabel u bënë prindër. Sulmuesi ka deklaruar se ardhja në jetë e fëmijës i ka sjellë më shumë qetësi dhe ekuilibër, duke ndikuar pozitivisht edhe në paraqitjet e tij në fushën e lojës.
Edhe pse vijon të ruajë privatësinë, Isabel është bërë gjithnjë e më e njohur në publik, veçanërisht për interesin e saj ndaj modës dhe praninë në rrjetet sociale, ku herë pas here ndan momente nga jeta familjare dhe mbështetjen për partnerin e saj.