Policia e Shtetit ka goditur dy raste të trafikimit të kanabisit me përqindje të lartë THC, të ardhur nga Shtetet e Bashkuara përmes shërbimeve postare.
Në kuadër të operacioneve “Dërgesa 1” dhe “Dërgesa 2”, u arrestua në flagrancë në Elbasan shtetasi Rakip Hoxha, 32 vjeç, teksa merrte 2 pako me rreth 4 kg kanabis. Ndërkohë, në Vorë, është shpallur në kërkim 21-vjeçari Flavio Islamaj, i dyshuar si pritësi i një pakoje tjetër me rreth 3.7 kg kanabis.
Në total, gjatë operacionit janë sekuestruar 3 pako me 7.7 kg lëndë narkotike. Autoritetet vijojnë punën për kapjen e Islamajt dhe për identifikimin e personave të tjerë të përfshirë në këtë rrjet trafikimi.
Sipas Policisë së Tiranës, vetëm gjatë kësaj jave janë goditur 5 raste të ngjashme, me një total prej rreth 10 kg kanabis të sekuestruar dhe 8 persona të identifikuar si të përfshirë.
Materialet procedurale janë referuar Prokurorisë së Tiranës për hetime të mëtejshme.