Presidenti i Republikës Serbe, Milorad Dodik, nuk do të vuajë dënimin me burg njëvjeçar, pasi ka shlyer atë duke paguar një gjobë prej 36.500 markash konvertibile (rreth 18.662 euro). Vendimi erdhi pas miratimit të kërkesës së mbrojtjes nga Gjykata e Bosnjë dhe Hercegovinës, e cila zëvendësoi çdo ditë burg me 100 marka (rreth 51 euro).
Në Bosnje dhe Hercegovinë ligji lejon zëvendësimin e dënimit me burg deri në një vit me pagesë monetare. Përveç burgut, Dodik është dënuar edhe me ndalim të veprimtarisë politike për gjashtë vite.
Ky vendim gjyqësor ka sjellë pasoja të menjëhershme politike: Komisioni Qendror Zgjedhor i Bosnjë dhe Hercegovinës i ka hequr mandatin si president të Republikës Serbe. Avokati i tij, Goran Bubiq, ka paraqitur ankesë dhe pritet që Këshilli i Apelit të marrë vendimin përfundimtar javën e ardhshme.