Një aksident i rëndë është regjistruar në aksin rrugor Vlorë–Llogara, pranë fshatit Fushë Dukat, ku një person ka humbur jetën dhe tre të tjerë kanë mbetur të plagosur.
Sipas informacioneve paraprake, një furgon që transportonte punëtorë, të cilët dyshohet se ishin nisur nga Tirana drejt zonës së bregdetit, ka dalë nga rruga dhe ka përfunduar në një kanal anësor.
Dyshimet e para janë se aksidenti mund të jetë shkaktuar nga përgjumja e drejtuesit të mjetit ose nga një problem shëndetësor i papritur.
Si pasojë e përplasjes, furgoni u deformua rëndë dhe disa prej personave mbetën të bllokuar brenda tij. Për nxjerrjen e tyre u desh ndërhyrja e zjarrfikësve, të cilët prenë pjesë të mjetit për të liruar të plagosurit.
Viktima është identifikuar si Ilir Haka, 52 vjeç, ndërsa të plagosur kanë mbetur Saimir Haka, 22 vjeç, Qazim Haka, 44 vjeç dhe Sako Rexha, rreth 22 vjeç.
Të plagosurit u transportuan me ambulanca drejt Spitalit Rajonal të Vlorës për të marrë ndihmën mjekësore, ndërsa trupi i viktimës u dërgua në morg.
Në vendngjarje kanë mbërritur shërbimet e Policisë Rrugore dhe grupi hetimor, të cilët po kryejnë veprimet procedurale për të zbardhur shkaqet e plota të aksidentit.