Kryeministri Edi Rama ka bërë publike një letërn që ka marrë nga Presidenti i Shteteve të Bashkuara, Donald Trump, në të cilën ai falënderon Shqipërinë dhe fton zyrtarisht vendin tonë të bëhet pjesë e një iniciative ndërkombëtare për paqen globale.
Në mesazhin e shpërndarë në rrjetet sociale, Rama shprehet se letra përfaqëson një vlerësim dhe një përgjegjësi, duke theksuar se do të bëjë gjithçka për të lartësuar emrin e Shqipërisë dhe dinjitetin e shqiptarëve.
Sipas përmbajtjes së letrës, Presidenti Trump i referohet Planit Gjithëpërfshirës me 20 pika për përfundimin e konfliktit në Gaza, i shpallur më 29 shtator 2025 dhe i mbështetur më pas nga Këshilli i Sigurimit i OKB-së përmes Rezolutës 2803. Në këtë kuadër, parashikohet krijimi i një strukture të re ndërkombëtare të quajtur “Bordi i Paqes”, i cili do të funksionojë si një administratë qeverisëse tranzitore për ndërtimin e paqes së qëndrueshme.
Trump fton zyrtarisht Shqipërinë, të përfaqësuar nga Kryeministri Rama, të bashkohet si Shtet Anëtar Themelues i këtij Bordi dhe të nënshkruajë statutin përkatës. Në letër theksohet se kjo nismë synon ndërtimin e paqes së përhershme, mirëqenies dhe stabilitetit global, duke përfshirë një grup vendesh dhe udhëheqësish botërorë të angazhuar në këtë proces.
Në përfundim të mesazhit, Presidenti amerikan shpreh gatishmërinë për bashkëpunim afatgjatë me Shqipërinë në funksion të paqes botërore dhe zhvillimit të qëndrueshëm.