Saga e trashëgimisë së yllit legjendar të kinemasë franceze, Alain Delon, ka marrë një kthesë të re. Djali i tij i vogël, Alain-Fabien Delon (31 vjeç), ka ngritur një padi në gjykatat civile të Parisit duke kërkuar anulimin e testamentit dhe donacioneve që e bëjnë motrën e tij, Anoushka Delon (34 vjeç), trashëgimtaren kryesore të babait të tyre.
Procesi gjyqësor, i planifikuar të nisë më 9 mars 2026, pritet të rihapë “luftën civile” që kishte shpërthyer mes fëmijëve të Delon edhe para vdekjes së tij në gusht 2024.
Sipas padisë, testamenti i 24 nëntorit 2022 dhe një dhurim i shkurtit 2023, përmes të cilëve Anoushka mori 51% të aksioneve të kompanisë që zotëron të drejtat e autorit të aktorit janë të pavlefshme, pasi në atë kohë Alain Delon, pas një goditjeje në tru në 2019, “nuk kishte më mirëkuptimin e nevojshëm” për të marrë vendime të tilla.
Ky testament zëvendësoi një version të vitit 2015, duke i dhënë Anoushkës kontroll ekskluziv dhe të përjetshëm mbi imazhin dhe veprën e Delon.
Alain-Fabien po padit motrën, vëllain e madh Anthony Delon, si dhe tre ekzekutorët e testamentit. Në të njëjtën kohë, një nga ekzekutorët, Christophe Aiella, ka paralajmëruar se do të nisë një “proces ndërmjetësimi për të shmangur një betejë të gjatë ligjore”.