DJ Gimbo pritet të vijë së shpejti para publikut me një projekt të ri muzikor, duke sjellë në një version modern një prej këngëve më të njohura të muzikës shqiptare, “DJ” të Rezarta Shkurtës.
Kënga, e publikuar rreth dy dekada më parë, vazhdon të mbetet një nga hitet më të dashura për publikun. Interesi për të u rikthye së fundmi edhe gjatë qëndrimit të DJ Gimbos dhe Selin Bollatit në Big Brother VIP Albania, ku u identifikua shpesh me momentet dhe dinamikat e çiftit brenda shtëpisë.
Për këtë rikthim është realizuar edhe një videoklip i ri, ku protagoniste do të jetë Selin Bollati, partnerja e DJ Gimbos dhe fituesja e edicionit të pestë të Big Brother VIP Albania.
Lansimi zyrtar i projektit është parashikuar për datën 5 qershor, ndërsa artisti ka nisur të shtojë pritshmëritë e fansave përmes publikimit të disa pamjeve nga prapaskenat e xhirimeve në rrjetet sociale.
Remiksi vjen në një moment kur interesi i publikut për çiftin mbetet i lartë, duke e kthyer projektin në një nga publikimet më të komentuara të javëve të fundit. Fansat tashmë presin të dëgjojnë versionin e ri të këngës dhe të shohin videoklipin e plotë që do ta shoqërojë atë.
