Në kuadër të 248-vjetorit të Pavarësisë së Shteteve të Bashkuara të Amerikës, Ambasada Amerikane në Tiranë ka organizuar një pritje festive, ku ka vlerësuar partneritetet dhe bashkëpunimin e ngushtë me Shqipërinë.
Përmes një postimi në rrjetet sociale, ambasada ka shprehur mirënjohjen e saj më të thellë për të gjithë partnerët dhe donatorët, që sipas saj, luajnë një rol të rëndësishëm në forcimin e tregtisë, investimeve dhe klimës së transparencës ekonomike mes dy vendeve.
“Ambasada e Shteteve të Bashkuara është mirënjohëse ndaj donatorëve tanë – të gjithë partnerë të kompanive amerikane që çojnë përpara mirëqenien e përbashkët amerikane dhe shqiptare, duke rritur tregtinë dhe duke kaluar njohuri thelbësore për të krijuar një klimë investimi më transparente”, thuhet në deklaratë.
Gjithashtu, ambasada nënvizon se partneritetet globale të biznesit kontribuojnë për një botë më paqësore dhe më të begatë, duke forcuar lidhjet e miqësisë ndërmjet popullit amerikan dhe atij shqiptar.
Eventi i Ditës së Pavarësisë është një nga momentet simbolike që thekson jo vetëm historinë e SHBA-së, por edhe marrëdhënien e qëndrueshme dhe në zhvillim me Shqipërinë, në fusha të tilla si ekonomia, siguria, arsimi dhe drejtësia.