Referendumi i shumëdiskutuar në Itali, që synonte lehtësimin e procedurave për shtetësinë dhe forcimin e mbrojtjes në vendin e punës, ka dështuar zyrtarisht për shkak të pjesëmarrjes së ulët të qytetarëve. Sipas të dhënave nga 90% e qendrave të votimit, vetëm rreth 30% e elektoratit mori pjesë – shumë më poshtë pragut ligjor prej 50% + 1 që nevojitet për të qenë i vlefshëm një referendum.
Kjo përbën një goditje të madhe për opozitën e qendrës së majtë dhe një fitore politike për koalicionin e djathtë në pushtet të kryeministres Giorgia Meloni, e cila kishte bërë thirrje për bojkot. Partia e saj “Vëllezërit e Italisë” reagoi menjëherë, duke e cilësuar dështimin si “një refuzim të qartë nga vetë qytetarët ndaj përpjekjeve për të rrëzuar qeverinë”.
“Qëllimi i vetëm i këtij referendumi ishte të rrëzohej qeveria Meloni. Në fund, ishin vetë italianët që rrëzuan opozitën,” shkroi partia në rrjetet sociale, bashkë me një foto ironizuese të liderëve të opozitës.
Në anën tjetër, lideri i sindikatës CGIL, Maurizio Landini – një nga nismëtarët e referendumit – pranoi me keqardhje humbjen, duke falënderuar ata që morën pjesë dhe duke theksuar nevojën për “rritje të vetëdijes qytetare për të ardhmen demokratike të vendit”.