Denar Biba është tërhequr nga kandidimi për vendin vakant të gjyqtarit në Gjykatën Kushtetuese, të shpallur nga Gjykata e Lartë më 11 dhjetor 2024.
Pas vendimit të tij, Këshilli i Emërimeve në Drejtësi (KED) ka konfirmuar listën e kandidatëve të kualifikuar që vijojnë garën: Alban Toro, Alma Faskaj, Asim Vokshi, Florian Ballhysa, Genta Tafa Bungo dhe Naureda Llagami.
Në mbledhjen e 4 shtatorit 2025, KED njoftoi përfundimin e verifikimit të kandidaturës së Bibës për shkak të tërheqjes së tij, ndërsa ka përmbyllur gjithashtu fazën e verifikimit për kandidaturat në vendin vakant të lënë nga Holta Zaçaj.
Procesi tashmë kalon në fazën e vlerësimit, pikëzimit dhe renditjes së kandidatëve, ku do të shqyrtohen dokumentacioni, pasuria, integriteti i figurës dhe përvoja profesionale. KED thekson se procedura do të vijojë në mënyrë transparente dhe objektive, për të garantuar përzgjedhjen e kandidatit më të kualifikuar për Kushtetuesen.