Shtëpia e Big Brother VIP Albania pritet të kthehet sonte në një atmosferë festive, pasi do të zhvillohet dasma e dytë e këtij edicioni. Pas ceremonisë së Selin Bollatit me DJ Gimbon, këtë herë kurorëzojnë lidhjen e tyre Brikena Selmani dhe Mateo Borri.
Për ta bërë edhe më të veçantë këtë mbrëmje, produksioni ka rezervuar një surprizë për banorët dhe publikun: në dasmë do të performojë si i ftuar special këngëtari i njohur Gena.
Lajmi është bërë i ditur përmes faqes zyrtare të spektaklit në rrjetet sociale, ku theksohet se atmosfera do të jetë e mbushur me muzikë dhe festë.
Kjo dasmë vjen menjëherë pas momentit romantik të një nate më parë, kur Mateo i propozoi Brikenës që të bëhej partnerja e tij. Në mungesë të një unaze, ai zgjodhi një byzylyk për t’i bërë propozimin, duke krijuar një nga momentet më të komentuara brenda shtëpisë.
Çifti tashmë ka ndarë edhe ftesat për banorët që dëshirojnë të jenë pjesë e ditës së tyre të veçantë, ndërsa pritet që ceremonia të sjellë emocione, surpriza dhe shumë argëtim për publikun.