Danimarka ka njoftuar një masë të re që synon të rrisë lexueshmërinë në vend: qeveria do të heqë taksa mbi vlerën e shtuar (TVSH) për librat, sipas raportimit të “The Guardian”. Aktualisht, libri mbart një TVSH prej 25%, norma më e lartë në botë, e cila, sipas qeverisë, ka ndikuar në rënien e leximit.
Ministri i Kulturës, Jakob Engel-Schmidt, deklaroi se ky hap do të propozohet në projektligjin e buxhetit dhe pritet të kushtojë rreth 330 milionë korona daneze (afërsisht 38 milion paund) në vit. “Ky është një hap i rëndësishëm për të luftuar krizën e leximit që ka përfshirë vendin në vitet e fundit,” tha Engel-Schmidt.
Ministri shtoi se është krenar për arritjen e konsensusit mes kolegëve për këtë investim në kulturën dhe konsumimin e librave në Danimarkë.
Danimarka nuk është e vetmja në rajon që ka rregullime të tilla. Vendet nordike aplikojnë standardin 25% të TVSH-së, por kjo nuk vlen për librat: Finlanda 14%, Suedia 6%, ndërsa Norvegjia zero. Pas uljes së TVSH-së për librat në Suedi në vitin 2001, shitjet u rritën, por kryesisht tek lexuesit ekzistues.
Qeveria daneze ka nisur gjithashtu bashkëpunime të ngushta midis bibliotekave publike dhe shkollave, për të prezantuar më shumë fëmijë me literaturë të mirë. Në vitin 2024, 8,3 milionë libra u shitën në dyqane dhe online në Danimarkë, një shifër e lartë duke pasur parasysh se vendi ka pak më shumë se 6 milionë banorë.